அது என்னய்யா பதிவுத்திருவிழா எனக் கேட்போருக்கு தமிழ்மணத்தால் இரண்டு மாதங்கள் நடத்தப்பட இருக்கும் பதிவுப் போர்க்களத்தின் சிறந்த இடுகைகளுக்கான கடும் வாக்கெடுப்பு தான் இந்தப்பதிவுத் திருவிழா. திசம்பர் மற்றும் சனவரி மாதங்களில் நடத்தப்பட்டு கடந்த வருடத்தின் 32 சிறந்த இடுகைகளைத் தேடும் இந்தத் திருவிழாவிற்கான அறிவிப்பு நோட்டீஸ் வெளியானதுமே பதிவர்களிடம் மகிழ்ச்சி இப்பவே களைகட்ட ஆரம்பித்து விட்டது.

பொதுவாக ஒரு போட்டி என அறிவிக்கப்பட்டால் அதற்கென மெனக்கெட்டு விடியவிடிய தூக்கமில்லாமல் விட்டத்தைப் பார்த்து சிந்தித்து சிற்பம் செதுக்குவது போல பார்த்துப் பார்த்து செதுக்கி ஸ்பெசலாகத் தயாரித்து வெளியிடலாம். ஆனால் போட்டிக்கென எழுதிய இடுகையாக இல்லாமல் இயல்பான சூழ்நிலைகளில் இயல்பான மனநிலையுடன் எழுதிய இயல்பான இடுகைகள் மொத்தத்தையும் அலசி ஆராய்ந்து அதிலே ஒன்றைத் தேர்ந்தெடுத்து போட்டிக்காக அனுப்பவதென்பது உண்மையிலே பாராட்டத் தக்க தமிழ்மணத்தின் ஏற்பாடாகும். இதன் மூலம் போட்டிக்கென எழுதப்பட்ட‌ சிறப்புபதிவாக இல்லாமல் நாம் கடந்த வருடத்தில் எழுதிய ஒரு பதிவு சிறப்பிக்கப்படுகிறது என மகிழ்ச்சியடையலாம்.

அந்த வகையில் தமிழ்மணம் மொத்தம் 16 தலைப்புகளின் கீழ் இந்தப் போட்டியை அறிவித்திருக்கிறார்கள். இந்த தலைப்புகளை மூன்று பிரிவுகளாக கீழ்க்கண்டவாறு வகைப்படுத்தலாம்.

1)கடும் போட்டி நிலவக்கூடிய தலைப்புகள்:

1. படைப்பிலக்கியம் (கதை, கவிதை, போன்றவை)

3. நூல், திரைப்படம் அறிமுகம்/விமர்சனம்/திறனாய்வுகள்

5. பயண அனுபவங்கள், ஊர்/வாழ்வு நினைவோடைகள்

6. செய்திகள்/நிகழ்வுகளின் அலசல்கள்

7. அரசியல், சமூக விமர்சனங்கள்

9. தலித் மக்களின் பிரச்சனைகள், மனித உரிமை, நிறவெறி தொடர்பான கட்டுரைகள்

13. சுயதேடல், பகுத்தறிவு, ஆன்மீகம்

12. நகைச்சுவை, கார்ட்டூன்

15. தமிழ்க்கணிமை, தமிழ் விக்கிப்பீடியா, தமிழ் இணையம் தொடர்பான கட்டுரைகள்

இந்தப் பிரிவிலே உள்ள தலைப்புகளின் கீழ் அனைத்துப் பதிவர்களும் அதிகதிமாக எழுதிக் குவித்திருக்கின்றனர் என்பது தெரிந்த விசயமே. ஆனால் தனித்தனியாக இருந்திருந்தால் நன்றாயிருக்குமே என்ற தலைப்புகள் ஒன்றோடு ஒன்று பிணைந்திருக்கின்றன. உதாரணமாக ஒரு நல்ல கதை, ஒரு நல்ல கவிதையை விழுங்கிவிடும். அதேபோல சினிமா விமர்சனம், நல்ல‌ புத்தக விமர்சனத்தை விழுங்கிவிடும். பகுத்தறிவு ஆன்மீகத்தை விழுங்கிவிடும். இவையெல்லாம் தனித்தனியாய் இருந்தால் ஒவ்வொன்றிலிருந்தும் சிறந்தவை முதன்மைபடுத்தப் படலாம். ஆனால் அதையும் மீறி தெளிவான படைப்புகள் எவ்வளவு தடைகள் போட்டாலும் உடைத்துக்கொண்டு வெளியேறிவிடும் என்பதை மறுக்கமுடியாது.

2) ஓரளவு போட்டி நிலவும் தலைப்புகள்:

4. அறிவியல், விவசாயம், சுற்றுச்சூழல், மருத்துவம், தொழில்நுட்பக் கட்டுரைகள் 8. பெண்கள் பிரச்னைகள், திருநங்கைகள் வாழ்வியற் சிக்கல்கள் 16. விளையாட்டு, உடல் ஆரோக்கியம், உடல்நலம் மற்றும் சமையல் தொடர்பான கட்டுரைகள்

அறிவியல், விவசாயம், சுற்றுச்சூழல், மருத்துவம்,பெண்கள் பிரச்னைகள், திருநங்கைகள் வாழ்வியற் சிக்கல்கள் போன்றவை மிகக்குறைவே! விளையாட்டு, உடல் ஆரோக்கியம், உடல்நலம் மற்றும் சமையல் தொடர்பான கட்டுரைகள் ஓரளவிற்கு எதிர்பார்க்கலாம். மருத்துவம் என்றாலே வலைப்பூக்களில் இன்று வலம்வருவது பாலியல் சம்பந்தமாகத் தான். செக்ஸ், கற்பழிப்பு, உடலுறவு, முதலிரவு, கள்ளத்தொடர்ப்பு, காமம் போன்ற‌ வார்த்தைகளை தலைப்புகளில் பயன்படுத்தி வரும் இடுகைகள் அதிகமாகப் படிக்கப்ப‌டுகிறது அல்லது பார்க்கப்படுகிறது. இதனால் சாதாரண மருத்துவ இடுகைகளை எழுதி ஓய்ந்த கைகள் இன்று பலான மருத்துவ இடுகை லேகியங்களை விற்பனை செய்ய ஆரம்பித்து விட்டன. ஆக மருத்துவம் என்ற தலைப்பிலே இதுவும் சேருமா?

3) அதிகம் போட்டியில்லாத தலைப்புகள்:

2. காட்சிப் படைப்புகள் (ஓவியம், ஒளிப்படம், குறும்படங்கள்) 10. ஈழ மக்களின் வாழ்வியல், மனித உரிமை, சமூக, பொருளாதாரச் சிக்கல்கள் 11. தமிழ் மொழி, கலாச்சாரம், வரலாறு, தொல்லியல் 14. பொருளாதாரம், வணிகம் தொடர்பான கட்டுரைகள்