நீதியின் குரல்:

வின்டிவி துவங்கப்பட்ட காலத்தில் இருந்து இன்றுவரை இந்த நீதியின் குரல் நேரலை நிகழ்ச்சி மிகப்பிரபலம். திரு.பாஸ்கரன் அவர்கள் வழங்கும் இந்த நிகழ்ச்சியில் அன்றாட சமூக அவலங்கள் தோலுரித்துக் காட்டப்படுகின்றன. ஒவ்வொரு நிகழ்வின் சாதக பாதகங்கள் சரியான‌ நபர்களைக் கொண்டு விவாதிக்கப்படுகின்றது.. அதுமட்டுமின்றி சம்பந்தப்பட்ட அந்த துறைகளின் அதிகாரிகள், அமைச்சர்களைத் தொடர்புகொண்டு இதுகுறித்த விசயங்களை உடனுக்குடன் கருத்தும் கேட்கப்படுகிறது. பார்வையாளர்களும் கலந்துகொண்டு கருத்து சொல்லலாம். இது அனைத்துமே நேரலையில் நடப்பதால் நிகழ்ச்சி மிக சுவாரஸ்யமாகிறது. திங்கள்,புதன்,வெள்ளி ஆகிய மூன்று நாட்களும் இந்திய நேரம் காலை 11 மணிக்கு நேரலையில் ஒளிபரப்பாகும். முன்னர் இரவு 9 மணிக்கு மறுஒளிபரப்புச் செய்யப்பட்ட இந்நிகழ்ச்சி இப்போது இரவு 10.30 க்கு மறுஒளிபரப்பாகிறது. சவூதி,குவைத் நேரம் இரவு 8 முதல் 9 வரையும், துபாய் நேரம் இரவு 9 முதல் 10 வரையும் கண்டு பயன்பெறலாம்.

நீதிக்காக:

செவ்வாய் மற்றும் வியாழக்கிழமைகளில் மேற்படி அதே நேரத்தில் ஒளிபரப்பாகும் நிகழ்ச்சி நீதிக்காக.. இந்த நிகழ்ச்சிக்கும் மேற்கண்ட நீதியின் குரலுக்கும் யாதொரு வித்தியாசமும் இல்லை.

வளைகுடா செய்திகள்:

உலக நடப்புகளை சிறப்பான காட்சிகளுடன் ஒளிபரப்பாகும் நிகழ்ச்சி வளைகுடா செய்திகள். முழுக்க முழுக்க வெளிநாட்டு செய்திகளை விரும்பும் நபர்களுக்கென தினசரி இந்திய நேரம் இரவு 10 மணிக்கு ஒளிபரப்பாகிறது. சவூதி,குவைத் இரவு 7.30 க்கும், துபாய் நேரம் இரவு 8.30க்கும் ஒளிபரப்பாகும். உலகின் அன்றாட நிகழ்வுகளை உடனுக்குடன் தெரிந்து கொள்ள இது ஒரு பயனுள்ள நிகழ்ச்சியாகும்.

செய்திகளும் நிஜங்களும்:

ஒரு சேனலின் எந்த ஒரு நிகழ்ச்சியையும் காப்பியடித்து அதை ஒரிஜினல் நிகழ்ச்சியை விட பிரபலமாக்கிவிடுவதை நாம் காண்கிறோம். ஆனால் ஒரு நிகழ்ச்சியை இதுவரை யாராலும் காப்பிசெய்ய முடியவில்லை என்றால் இது இந்த செய்திகளும் நிஜங்களும் நிகழ்ச்சிதான். காரணம் அதை இன்றுவரை வழங்கிவரும் அரசியல் விமர்சகர் திரு டி.எஸ்.எஸ் மணி போல சுவாரஸ்யமாகக் கொடுப்பதற்கு மற்றவர்களால் முடியுமா என்பது நமக்குத்தெரியவில்லை. நிகழ்ச்சியின் ஆரம்பத்தில் இவரோடு சேர்ந்து திரு.ராஜா அவர்கள் நிகழ்ச்சியை வழங்கிக் கொண்டிருந்தார். பின்னர் எஸ்.எம் பாக்கர் இணைந்து வழங்கினார். இப்போது நீதியின் குரல் பாஸ்கரன் இணைந்து வழங்குகிறார். இவ்வளவு மாற்றங்கள் கண்டும் இந்நிகழ்ச்சி இதுவரை சுவாரஸ்யம் குறையாமல் சென்று கொண்டிருக்கிறது. இந்திய நேரம் காலை 8 மணிக்கும், மறுஒளிபரப்பு மதியம் 12.30க்கும் வந்துகொண்டிருக்கிறது.

அதாவது தமிழகத்தில் வெளியாகும் அனைத்துப் பத்திரிகைகளும் ஒவ்வொரு செய்திகளையும் எவ்வாறு வெளியிட்டிருக்கிறார்கள் என்பது பற்றியும் அந்த செய்திகளின் உண்மை நிலை பற்றியும் தெளிவாக விளக்கப்படுகின்றது. இதன்மூலம் நாம் அனைத்துப் பத்திரிகைகளின் சாராம்ச செய்திகள் மற்றும் முக்கியச்செய்திகளை அறிந்து கொள்ள இதுஒரு நல்ல வாய்ப்பாக இருக்கின்றது. இதுபோன்ற ஒரு நிகழ்ச்சி இலங்கையிலிருந்து ஒளிபரப்பாகும் டான் தமிழ்ஒளியில் ஒளிபரப்பாகிறது. அவர்கள் அங்கிருந்து வெளியாகும் வீரகேசரி,தினகரன் போன்ற தமிழ்பத்திரிகைகளிலும், சிங்கள பத்திரிகைகளில் இருந்தும் அரசஜால்ரா செய்திகளை மட்டும் அச்சுப்பிசகாமல் அலசுகின்றனர்.

வின்டிவியின் செய்திகளும் நிகழ்ச்சியை நான் ஆரம்பத்திலிருந்தே கண்டுவருகிறேன். ஆனால் வளைகுடா நேயர்களுக்கு இந்த நிகழ்ச்சியினை கானும் வாய்ப்பு சுத்தமாக இருக்காது. காரணம் வளைகுடா நாடுகளில் காலை 8 மணிக்கே அலுவலகம் துவங்கிவிடுவதால் இதை விடுமுறை நாளான வெள்ளிக்கிழமைகளில் மட்டுமே கானும் வாய்ப்பு இருந்தது.

என்னுடைய முயற்சி:

பல நண்பர்களும் இந்த நிகழ்ச்சியின் ரசிகர்களாக இருப்பது எனக்கு ஆச்சரியத்தைத் தந்தது. அதனால் இதை வளைகுடா நேயர்களுக்கும் கொண்டு செல்ல முயற்சி எடுத்து வின்டிவியின் நிர்வாக இயக்குனர் திரு. தேவநாதன் அவர்களை தொடர்பு கொண்டு இந்த நிகழ்ச்சி குறித்து விளக்கினேன். இந்நிகழ்ச்சியை மீள்ஒளிபரப்பு செய்வதால் வளைகுடா நேயர்கள் பயன்பெறுவார்கள் என்றும் சொன்னேன். என்ன ஆச்சரியம், நான் ‍பேசிய அதேநேரத்தில் அவரும் சில நிகழ்ச்சிகளை வளைகுடா நேரத்திற்கு மாற்றங்களைச் செய்ய இருப்பதாக தெரிவித்தார். அதுமட்டுமின்றி உங்களுக்கு எந்த நேரத்தில் மேற்படி நிகழ்ச்சியை ஒளிபரப்ப வேண்டும் எனவும் என்னிடம் கேட்டுக்கொண்டார்.

பிரைம் டயத்தை இப்போது இரவு 11.30 வரை நீட்டித்து விட்டதாலும் அதற்குப் பிறகு மீடியாவேல்ட் வழங்கும் இஸ்லாமிய மார்க்க நிகழ்ச்சியும் நள்ளிரவு 12.30 க்கு செய்திகளும் ஒளிபரப்பாவதால் அதைத்தொடர்ந்து மேற்படி நிகழ்ச்சியை ஒளிபரப்பலாம் என்றும் ஆனாலும் அதற்கு முன்னதாக ஒளிபரப்பினால் நலம் என்றும் தெரிவித்தேன். பரிசீலிப்பதாகக் கூறியிருந்தார். நான் கூறியகருத்துக்களை மிகவும் பொருமையாக, தெளிவாக செவிமடித்தார். மிக்க நன்றி திரு. தேவநாதன்.

அதன்படி நேற்றுமுதல் நள்ளிரவு 1 மணிக்கு செய்திகளும் நிஜங்களும் மீள் ஒளிபரப்பாகிறது. இது ஒரு நல்ல நிகழ்ச்சி என்பதால் தான் இந்த இடுகையேயன்றி தனிப்பட்ட விளம்பரம் அல்ல. சவூதி மற்றும் குவைத் நண்பர்கள் இரவு 10.30 க்கும், துபாய் நண்பர்கள் இரவு 11.30க்கும் இந்நிகழ்ச்சியைக் காணலாம். வின்டிவியின் அலைவீச்சி இல்லாத மற்றைய நாடுகளில் வாழும் தமிழ் மக்கள் கவலை கொள்ளவேண்டாம். காரணம் வின்டிவியின் அனைத்து நிகழ்ச்சிகளும் உடனுக்குடன் வின்டிவி இணையதளத்தில் வெளியிடப்படுகிறது.

நம் கோரிக்கையை பரிசீலித்து ஏற்றுக்கொண்ட வின்டிவி நிர்வாக இயக்குனர் திரு.திருவே தேவநாதன் அவர்களுக்கு மீண்டும் என் நன்றியைத் தெரிவித்துக்கொள்கிறேன்.