"இல்ல‌டா நான் அவ‌ள் விடுற‌தா இல்ல‌. நாளைக்கு காலைல தான் அவ கல்யாணம்.. காலை வரைக்கும் டைம் இருக்கு. என்ன‌ செய்ய‌லாம்? அதுக்குத்தான் உன்ன‌க் கூட்டி வ‌ந்திருக்கேன் ந‌ல்ல‌ ஐடியாவா சொல்லு" கேட்ட‌வாறு க‌ல‌வை போட்ட‌ கிளாஸை சுரேஷிட‌ம் நீட்டினான்.

அதை வாங்கிய‌ சுரேஷ் ஒரே மூச்சில் காலி செய்துவிட்டு ஒருமுறை க‌ணைத்துக்கொண்டான். ப‌க்க‌த்தில் இருந்த‌ மிக்ச‌ர் பொட்ட‌ல‌த்தை உடைத்து அதை அப்ப‌டியே வாயில் கொட்டிவிட்டு, வில்ல‌த்த‌ன‌மான‌ ஒரு பார்வையுட‌ன் சம்பந்தத்தின் அருகே வ‌ந்து அவ‌ன் காத‌ருகே சொன்னான்,

"அப்படின்னா அவ‌ளைப் போட்டுத்த‌ள்ளிட‌லாம்"

"என்ன‌து கொலையா, வேண்டாம்டா, கொலை ப‌ண்ற‌ அள‌வுக்கு என‌க்கு தைரிய‌ம் கிடையாது. வேற‌ ஏதாவது சொல்லு" நடுக்கத்துடன் கையில் இருந்த சரக்கை ஒரே மூச்சில் வாயில் ஊற்றிக்கொண்டான்.

"இல்ல‌டா ஏமாத்துற‌ பொம்ப‌ளைங்க‌ளுக்கெல்லாம் ஒரே முடிவு சாவு தான். ஒருத்திக்கி பாட‌ம் குடுத்தாதான் அடுத்த‌வ‌ளும் திருந்துவா"

ஒரு சிகெரெட்டைப் பத்தவைத்தவாறு சொன்ன சுரேஷை பயத்தோடு நெருங்கிய சம்பந்தம்

"கொலை பண்ணிட்டு தப்பிக்கிறது அவ்வளவு ஈசியில்ல. எப்படியும் போலீஸில மாட்டிக்கிவோம்."

" பிளான் பெயிலியர் ஆனாத்தானே மாட்டிக்கிவோம்? நான் போடுற பிளான் நிச்சயமா பெயிலியர் ஆவாது. நாளைக்கு காலைல எத்தன மணிக்கு கல்யாணம்?"

"காலைல ஏழரை டு பத்தரை முகூர்த்தம்"

"எந்த மண்டபம்"

"சந்திரா விலாஸ்"

"நாளைக்கு காலைல 5 மணிக்கு நாம ரெண்டு பேரும் மண்டபத்துக்குள்ள நுழஞ்சிருவோம். சமயக்கட்டுக்குப் போனோம்னா அங்கே காபி தயாரா இருக்கும். எப்படியும் காலை வேலைல வேலையாட்கள் கம்மியாத்தான் இருப்பாங்க. நாம ரெண்டு பேரும் காபி தட்ட எடுத்துக்கிட்டு ஒவ்வொரு அறைக்கா கொடுக்கற மாதிரி மணமகள் அறைக்கும் போவோம். அங்கே அனேகமா எல்லாரும் தூக்கக் கலக்கத்துல தான் இருப்பாங்க.உள்ளே போனதும் மயக்க மருந்து ஸ்பிரேய அந்த ரூம் பூரா அடிச்சோமுன்னா எல்லாரும் மயக்க நெலைக்கி போயிடுவாங்க. அரைமயக்கத்தில இருக்கற பத்மாவைப் பரலோகம் அனுப்பிட்டு நாம ஒன்னுமே தெரியாத மாதிரி கெளம்பி வந்திரலாம். எப்படி என் ஐடியா?"

"சூப்பர் ஐடியா மாமே! இதக்கேட்டதும் எனக்கு ரொம்ப சந்தோசமா இருக்கு. நாளைக்கு எல்லா டிவிலயும் அவதான் பிளாஸ் நியூஸா ஓடப்போறா.., ஹா.., ஹா.., ஹா.., வா மாமே அடுத்த ரவுண்டு போடலாம்"

சொல்லியவாறு அடுத்த ஹாப் பிராந்தி பாட்டிலைத் திறந்து இருவர் கிளாசிலும் ஊற்றினான். அரை மயக்கம்,போதை, அரை இருட்டு என மூன்றும் சேர்ந்து கொள்ள தண்ணீர் பாட்டிலை எடுக்க கைய நீட்டியவன் தவறுதலாக அந்த பாட்டிலை எடுத்தான்.

வியாழக்கிழமை காலை 6 மணி;

சந்திரவிலாஸ் கல்யாண மண்டபம்.

இரவு முழுக்க தூக்கமில்லாமல் புரண்டு படுத்து அதிகாலையில் தூங்கி இப்போது எரிச்சலோடு எழுந்தாள் பத்மப்பிரியா. பிரஸில் பேஸ்ட்டைப் பிதுக்கி வைத்துக் கொண்டு அரைத்தூக்கமாய் நின்றாள்.

"இன்னும் என்னடி பண்ற, சீக்கிரம் குளிச்சிட்டு வா, முகூர்த்தத்துக்கு நாளிகை ஆயிக்கிட்டிருக்கு"

சொல்லியவாறே ஒரு மாமி பரபரப்பாய் அங்குமிங்கும் ஓடிக் கொண்டிருந்தாள்.

பெட்டியைத் திறந்து டர்க்கி டவலை எடுத்தவாறு பாத்ரூம் நோக்கிச் சென்றாள். முன்னதாக கட்டிலருகே நின்று அங்கிருந்த டிவியை ஆன் செய்து சேன‌ல்க‌ளை மாற்றி மாற்றிப் பார்த்துக் கொண்டிருந்தாள்.

திடீரென‌ அந்த‌ நீயூஸ் சேன‌லை பார்க்க‌ அங்கே ப‌ட‌க்காட்சிக‌ளுட‌ன் செய்தி ஓடிக்கொண்டிருந்த‌து.

"மொட்டை மாடியில் இரு வாலிப‌ர்க‌ள் விச‌ம் குடித்து த‌ற்கொலை, கார‌ண‌ம் என்ன‌ போலீஸ் விசார‌னை"

இதைப் பார்த்து அதிர்ந்த‌ ப‌த்மா சேன‌லை மாற்றாம‌ல் அப்ப‌டியே நின்று கொண்டிருந்தாள்.

"ஏன்டி! நான் காட்டுக்கத்து கத்திண்டிருக்கேன்..,இப்ப‌ டிவி ஒரு கேடா, போயி சீக்கிர‌ம் குளிச்சிட்டு வாடி" அதே மாமி.

டிவியை அனைத்த‌வாறு குழப்பத்தோடு பாத்ரூம் நோககி நடந்தாள் . ஆனால் அவ‌ளுக்கு ஒன்னே ஒன்னு புரிய‌வில்லை.

"இவ‌ன் செத்தான் ஓக்கே…, அவ‌ன் ஏன் செத்தான்?"

இந்தக் கேள்வி பத்மாவின் மனதில் மாறி மாறி ஓட சிந்தனையுடன் ஹீட்டர் சுவிட்சை ஆன் செய்து 100 சதவிகித முழுமையான குளியலை முடித்தாள். குளித்து முடித்து ஹீட்டரை ஆப் செய்ய மீண்டும் சுவிட்சில் அந்த ஈரக் கையை வைக்க, பத்மா மீது திடீர் காதல் கொண்ட அந்த சுவிட்ச் அவளைப் பிடித்து வொய்ங்..,வொய்ங்..,வொய்ங் என‌ இழுக்க ஆரம்பித்தது.

"இவ‌ன் செத்தான் ஓக்கே…, அவ‌ன் ஏன் செத்தான்?"

கேள்விகள் மீண்டும் மீண்டும் எழ சுவிட்சில் இருந்து கையை எடுக்க முடியாமல் பத்மாவின் விழிகள் மேற்கூரையை நோக்கி நிலைகுத்தியது..