முதல் சுற்று:

முதலில் நிகழ்ச்சியின் நட்சத்திர போட்டியாளர் ஸ்ரவன் களமிறங்கி நான் கடவுள் படத்தில் இடம்பெற்ற "ஓம் சிவோகம்" பாடலை பாட அரங்கமே களைகட்டியது. உண்மையிலே அவர் மீது இருந்த எதிர்ப்பார்ப்பை அருமையாக பூர்த்தி செய்தார். ஸ்ரவன் பாடுவதைப் பார்த்து அனேகமாக வெற்றிபெறப்போவது இவராகத்தான் இருக்கும் என்ற எண்ணம் எழுந்தாலும், மீதமுள்ள நான்கு பேரும் குறிப்பாக அல்காமீது இருந்த எதிர்பார்ப்பு ஸ்ரவனை பெண்டிங்கில் வைக்க வைத்தது. ஸ்ரவன் பாடிய முதல்பாடலே நிகழ்ச்சியைப் பார்க்கும் ஆவலைத் தூண்டி இருக்கும்.ஸ்ரவனைப் பொருத்தவரை எல்லா சுற்றிலும் நல்ல மதிப்பெண்களைப் பெற்று இறுதிப் போட்டிக்கு தேர்வாகி இருந்தார் என்பது குறிப்பிடத்தக்க விசயம்.

அடுத்து வந்தவர் எல்லாரும் செல்லக்குரலாக பார்க்கும் ரோசன். அந்த கண்ணாடிக்குள் சிரிக்கும் குட்டிப்பையன். இவரும் இறுதிச்சுற்றுக்கு நேரடியாக தேர்ந்தெடுக்கப்பட்டவர் என்பது குறிப்பிடத்தக்கது. இந்தப் போட்டிக்கு உதயா படத்திலிருந்து உதயா உதயா உளறுகிறேன் பாடலை பாடினார். ஆனாலும் அவர் குரலை மிஞ்சி இசை கேட்டதால் ரோசன் இந்தப் போட்டியில் நீடிப்பது கடினம் என்றே தோன்றியது. பாடல் தேர்வில் கொஞ்சம் கவனம் செலுத்தியிருக்க வேண்டும் என நினைக்கிறேன்.

இரண்டாம் சுற்று:

முதல் சுற்று முடிந்து இரண்டாம் சுற்று துவக்கப்பட்டது. இதிலே முதல் போட்டியாளராக அல்காவே பங்கேற்று சில்லுனு ஒரு காதல் படத்தில் இடம்பெற்ற முன்பே வா பாடலை பாடி முடித்தார். ஆனால் இந்த முறை அவர் பாடிய விதம் சொல்லிக் கொள்ளும் படியில்லை. மைனஸ் பாயிண்டுகளை சேர்த்து விடுமோ என்ற நிலை ஏற்பட்டது. அடுத்து களமிறங்கிய ரோசன், ஜோடி படத்தில் இடம்பெற்ற ஒரு பொய்யாவது சொல் கண்ணே என்ற பாடலை பாடினார். இந்த முறையும் அவரது குரலை இசை மிஞ்சிவிட இதுவும் ஏமாற்றமாய் முடிந்தது. ரோசனுக்கு நல்ல குரல்வளம், ஆனால் சரியான பாடல் தேர்வு இல்லை.

அடுத்து களமிறங்கியது நித்யஸ்ரீ. பிரம்மா படத்தில் இடம்பெற்ற இவள் ஒரு இளம் குருவி என்ற பாடலை பாடினார். பிரமிக்க வைத்தது அவரின் பாடல். ஆங்காங்கே பேசிக்கொண்டிருந்த பார்வையாளர்கள் மொத்தமாக அமைதியாகி விட்டனர். அற்புதமாக பாடி முடித்தார் நித்யஸ்ரீ. நிச்சயமாக நித்யஸ்ரீ முதலிடம் அல்லது இரண்டாவது இடமாவது பிடிப்பார் என கருதவைத்தது இந்தப் பாடல்.

அடுத்து வந்த குட்டிப்பையன் ஸ்ரீகாந்த் நினைத்தாலே இனிக்கும் படத்தில் வரும் நம்ம ஊரு சிங்காரி பாடலை பாடி அரங்கையே அதிரவைத்தான். ஆங்காங்கே ரசிகர்கள் ஆடத்துவங்கியிருந்தனர். ஆனாலும் இது வெற்றியைத் தேடித்தராது என்ற பாணியிலேயே இருந்தது அவரின் நடை. இறுதியாக களமிறங்கிய ஸ்ரவன், பவித்ரா படத்தில் இடம்பெற்ற உயிரும் நீயே, உடலும் நீயே பாடலை பாடினார். இந்தப் பாடல் அவரின் முந்தைய சாதனைகளை பின்னுக்குத் தள்ளி மொக்கையாக்கி விட்டது.

ஸ்ரவன் பாடி முடித்த பிறகு 5 நிமிடம் கழித்து வாக்களிக்கும் நேரம் முடிவடைந்தது. போட்டிகள் முடிந்த நிலையில் நம்மாள் ஓரளவுக்கு முடிவுகளை கணிக்க முடிந்தது. ஸ்ரீகாந்த்,ரோசன் ஆகியோர் இறுதி இடத்திலும், அல்கா,ஸ்ரவன், நித்யஸ்ரீ ஆகிய மூவரில் ஒருவர் முதல் இடம் பெறுவார்கள் என்றும் இன்னும் சொல்லப்போனால் அல்காவிற்கு முதலிடம் கிடைக்க வாய்ப்பிருக்கலாம் எனவும் கணிக்க முடிந்தது. இறுதியாக சூர்யாவின் தம்பி கார்த்தி மேடைக்கு வந்து முடிவுகளை அறிவித்தார். அதன்படி குறைந்த‌ வாக்குகள் பெற்ற ரோசனும், நித்யஸ்ரீயும் மூன்றாவது இடத்தைப் பிடித்தனர். இவர்களுக்கு தலா 2 லட்சம் பரிசு வழங்கப்பட்டது. அடுத்த இடமான இரண்டாவது இடத்தை ஸ்ரீகாந்த் வென்றார். அவ‌ருக்கு 3 லட்ச ரூபாய் பரிசுத் தொகை வழங்கப்பட்டது. கடைசியாக ஸ்ரவனும் அல்காவும் மீதமிருக்க யாருக்கு முதல் பரிசு என பரபரப்பு நிலவியது. அதிரடியாய் அல்காவின் பெயர் அறிவிக்கப்பட்டது. ஸ்ரவன் ரன்னராக தேர்ந்தெடுக்கப்பட்டார்.

நிகழ்ச்சியின் ஹைலைட் சில:

* நிகழ்ச்சிக்கான ஆயத்தப்பணிகள் துவக்கப்பட்டதிலிருந்து மழை வருவது போன்ற அறிகுறி நிலவியது.ஆனால் தூறலோ மழையோ பெய்யவில்லை.

* அர‌ங்கம் நிறைந்திருந்த போதும் வாசலில் கூடியிருந்த ரசிகர்களை ஒரு நேரத்தில் இலவசமாக அனுமதித்தினர். வந்தவர்கள் மைதானத்தின் பின்புறம் சுற்றி நின்று வேடிக்கை பார்த்தனர்.

* ராயப்பேட்டை பாலத்தின் மேல் நிறைய ரசிகர்களை காண முடிந்தது. ஆனால் அங்கிருந்து பார்த்தால் எந்த அளவிற்கு தெரியும் என்பது தெரியவில்லை.

* நிகழ்ச்சி துவங்கி அரை மணிநேரம் கழித்து தான் விஜய் டிவி அதை ஒளிபரப்பு செய்ய ஆரம்பித்திருந்தது. நேரம் ஆக ஆக விளம்பரங்கள் அதிகமாகி கிட்டத்தட்ட 2 மணி நேரம் வரை இடைவெளி விழ ஆரம்பித்திருந்தது.

* நிகழ்ச்சிக்கு வந்திருந்த ரசிகர்கள் ஆரவாரமாக நிகழ்ச்சியை ரசித்தனர். தொலைக்காட்சி ஒளிபரப்பு தாமதமாய் போய்க்கொண்டிருந்ததால் பலரும் அவர்கள் நண்பர்களுக்கு, குடும்பத்தாருக்கு வெற்றி குறித்த செய்திகளை மொபைல் வழியாகவும், குறுஞ்செய்தி வழியாகவும் அனுப்பிய படி இருந்தனர்.

* போட்டியாளர்கள் அனைவரும் பாடி முடித்த பின்னர் சில பாடகர்கள்,பாடகிகள் தங்கள் பாடிய பாடலை ஆட்டத்துடன் அறங்கேற்றினார்கள்

* ஒரு நேரத்தில் இசையமைப்பாளர் தேவிஸ்ரீபிரசாத்தை அழைக்க, அவர் கங்கை அமரனையும் மிஞ்சும் அளவிற்கு மைக்கை கடித்து குதறிவிட்டார். பலருக்கு அவர் செய்த ஓவர் ஆக்சன்கள் கோபத்தை வரவழைக்க சத்தமிட்டபடி இருந்தார்கள். இப்படியே அதிகமாக பின்பக்க ரசிகர்கள் சிலர் சப்தத்துடன் சிலர் செருப்புகளையும் தூக்கிக் காட்ட ஆரம்பித்தார்கள். ஆனால் அடங்காத தேவிஸ்ரீபிரசாத் பல பாடல்களை கடித்து குதறி விட்டுத்தான் சென்றார்.

* நிகழ்ச்சிகளை எந்த தொய்வும் இன்றி திவ்யாவும், சிவகார்த்திகேயனும் சிறப்பாகத் தொகுத்து வழங்கினார்கள்

* நிகழ்ச்சியின் இறுதியில் முந்தைய‌ சூப்பர் சிங்கர்களும், இன்றைய ஜூனியர்களும், பாடகர் ஸ்ரீநிவாஸோடு இணைந்து சூப்பர் சிங்கர் பாட‌லை பாடினார்கள்.

* விழாவில் சிறப்பு விருந்தினராக கலந்து கொண்ட கார்த்தி பேசும் போது, இனிமேல் முதல்பரிசு இரண்டாம் பரிசு என பிரிக்காமல் அனைவரையும் வெற்றியாளர்களாக அறிவிக்க வேண்டும் என கேட்டுக்கொண்டார்.

* முதல்பரிசாக 25 லட்சம் மதிப்புடைய வீடு பரிசாக அல்காவிற்கு வழங்கப்பட்டது. இது ஏற்கனவே பேசிவைத்து தான் செய்கிறார்கள் என ரசிகர்கள் சிலரின் முனகளையும் கேட்க முடிந்தது.

* இந்த இறுதிப்போட்டிக்கு மட்டும் கிட்டத்தட்ட 3 லட்சத்து 64 ஆயிரம் குறுஞ்செய்திகள் வந்துள்ளன. ஒரு குறுஞ்செய்திக்கு ரூ 3 கட்டனமாக பிடிக்கிறது ஏர்டெல். வாழ்வு தான்.