ஸ்வீட்***காரம்***காபி***04/01/2010

காலம் செய்த கோலமடி, கடவுள் செய்த குற்றமடி

பல இடங்களுக்கும் கங்காரு போல தாவித்தாவி அலுத்துப்போய் விட்டார் மருத்துவர் ராமதாஸ். இவர் போய்ச் சேரும் கூட்டணி ஜெயிக்கும் என்ற டாக் இப்போது சுத்தமாக அடிபட்டுப் போய்விட தனிமரமாகி விட்டார் மருத்துவர் அய்யா. இந்த நிலையில் மருத்துவர் அய்யாவின் அடிப்பொடிகள் ரொம்ப நாளாக எழுப்பிவந்த கோசம் தனியாக நிற்பது என்பது. ஆனால் காலத்தின் சூழ்நிலை கருதி அதை முற்றிலும் மறுத்துவந்தார் மருத்துவர். இந்த நிலையில் பென்னாகரம் இடைத்தேர்தலை பாமகவுக்கு ஒரு சோதனைக் களமாக மாற்றும் முயற்சியில் இறங்கியுள்ளது பாமக செயற்குழு. சமீபத்தில் தைலாபுரத்தில் கூடிய செயற்குழுவில் இந்த தேர்தலில் பாமக போட்டியிடலாமா என்ற விவகாரம் அலசப்பட்டு அதிகபட்சமாக பாசிடிவ் ரிசல்ட்டே கிடைத்திருக்கிறது.

இந்த செயற்குழுவிற்கு முன்னதாக மருத்துவர் அய்யா பல முக்கியஸ்தர்களுடன் ஆலோசனை நடத்தியுள்ளார். அதாவது வன்னியர்கள் வாக்குவங்கி இன்னமும் நமக்குத்தான் இருக்கிறதா அல்லது சிதைந்துவிட்டதா என்பதை இந்த பென்னாகரம் தேர்தல் மூலமாக சோதித்துக் கொள்ள ஏற்பாடே இந்த போட்டியிடும் முடிவாம். அதாவது எந்தக் கட்சியில் சேர்ந்தாலும் அதிகபட்சம் 10 முதல் 15 வரை சீட் கிடைக்கிறது என்றும் இதிலே நம் வன்னியமக்கள் வாக்குவங்கியுள்ள பகுதிகள் எப்படியும் 14 தொகுதிகள் தேறும் என்றும், மிகக்கடுமையாக உழைத்தால் குறைந்தது 10 தொகுதிகளிலாவது வரும் சட்டசபைத் தேர்தலில் வென்றுவிடலாம் என்றும் பாமகவின் நலன்விரும்பிகள் தெரிவிக்க அதைச் சோதிக்கும் சோதனைக் களமாக் இந்த பென்னாகரத்தை எடுத்துக்கொள்ளப் போகிறாராம் மருத்துவர் அய்யா.

மஹாராஷ்டிர மாநிலம் செம்பூர் என்ற இடத்தில் நிழலுலக தாதா சோட்டாராஜனின் கூட்டாளிகள் நடத்திய புத்தாண்டு விருந்தில் குத்தாட்டம் போட்டு குப்புற கவிழ்ந்த காவல் அதிகாரிகள் தற்காலிக பணி நீக்கம் செய்யப்பட்டுள்ளனர். போனமா வந்தமான்னு இல்லாம புல்லா சரக்கடிச்சிட்டு அங்கிருந்த நடன தாரகைகளுடன் குத்தாட்டம் போட்டு கும்மாளம் அடிக்க, ஆஹா நம்ம காவல் துணை ஆணையாளரும், உதவி ஆணையாளரும் என்னா போடு போடறாரு என செல்போனில் அதைப் படமெடுத்து புளுடூத் வழியாக பரவி கடைசியில் அவர்களை கமிசன் முன்னிலையில் நிறுத்திவிட்டது. ஆடிய ஆட்டத்திற்கு கொஞ்ச நாளைக்கு ஓய்வு எடுத்துக்குங்க என அவர்களை சஸ்பென்ட் செய்து வீட்டுக்கு அனுப்பிவிட்டது மஹாராஷ்டிர அரசு. என்ன தான் நாட்டுக்கு போலீஸா இருந்தாலும் வீட்டுக்கு அவங்க குடிமகன்கள் தானே?

எவனுக்கும் பயப்படமாட்டோம்: ராஜபக்சே :

ராஜபக்சே, பொன்சேகா ஆகியோரின் பகையால் புதைந்து போன ஏகப்பட்ட ரகசியங்கள் தற்போது வெளியாகிக்கொண்டிருக்கின்றன. அந்த வகையில் சமீபத்தில் வெள்ளைவாகன கடத்தல் சம்பவம் பற்றியும், அதிலே அடைத்து வைக்கப்பட்டிருக்கும் 4000 தமிழர்களில் 1000 பேரின் பெயர் பட்டியலும் வெளியாக அதிர்ந்து போனது ராஜபக்சே அரசு. அத்தோடு வன்னிக்களத்தின் இறுதிப்போரில் சரணடைந்த புலிகளை கொடூரமாக சுட்டுக்கொன்ற செய்தியும் அதிலே சம்மந்தப்பட்டவர்கள் குறித்தும் தகவல்கள் வெளியாகிய வண்ணம் இருந்தாலும் அதைப் பற்றியெல்லாம் துளியும் கவலைப்படாமல் இருக்கிறார் ராஜபக்சே. அதுமட்டுமின்றி சமீபத்தில் அவர் வீணாக செலவு செய்த கோடிக்கணக்கான அரச செலவுகள் பற்றிய பட்டியலும் வெளியாகியுள்ளதும் குறிப்பிடத்தக்கது. இதெல்லாம் பொன்சேகாவின் சதி என்றும் தான் யாருக்கும் பயப்படப் போவதில்லை என்றும் வெற்றி எனதே எனவும் வீரக்கோசங்களை எழுப்பிவருகிறார் இந்த வீரசிம்மன்.

குழப்பம் தீராத தமிழ்தேசிய கூட்டமைப்பு:

யாரை ஆதரிப்பது என இன்னமும் குழப்பத்தில் இருக்கிறது தமிழ்தேசிய கூட்டமைப்பு. நிச்சயம் ராஜபக்சேவுக்கு ஆதரவு கிடையாது என்றாலும் பொன்சேகாவை எப்படி ஆதரிப்பது எனவும் யோசித்து வருகிறதாம். இந்த நிலையில் தமிழர்களின் ஆதரவை விக்ரமபாகு கோரியிருந்தாலும் அவருக்கு கிடைக்குமா என்பது சந்தேகமே! தேர்தலுக்கும் இன்னும் கொஞ்ச நாட்களே இருக்கும் நிலையில் தங்கள் ஆதரவை விரைவில் அறிவிக்கும் அவசர நிலைக்குத் தள்ளப்பட்டுள்ளது ததேகூ. ஆதரவு நிச்சயம் பொன்சேகாவுக்குத்தான் எனவும் சில தகவல்கள் கசிகின்றன.

2009 ல் திவாலான தமிழ் சினிமா உலகம்:

இதுவரை இது போன்ற ஒரு நிலையை தமிழ்சினிமா கண்டதேயில்லை என ஆகிவிட்டதாம் 2009. நல்ல லாபம் சம்பாதித்த படங்கள் பட்டியலில் பத்து படமும், ஓரளவு லாபம் சம்பாதித்த படங்களில் பத்து படங்களும் மட்டுமே இருக்கிறதாம். திருட்டு டிவிடி மட்டுமே பிரச்சனையாக இருந்த காலம் போய் இப்போது இண்டெர்நெட்டிலும் படங்கள் துல்லியமாக வெளியிடப்படுவதால் இப்போது தமிழ்த்திரையுலகிற்கு கடந்த ஆண்டு மட்டும் 155 கோடிக்கு மேல் நஷ்டமாம். பழையபடி கருப்பட்டி காய்ச்ச போகலாமா என பல தயாரிப்பாளர்களும் மூட்டைகட்டி கிளம்ப இருக்கிறார்களாம். இனிமேல் பெரிய கம்பெனிகளும், டிவி கம்பெனிகளும், என்.ஆர்.ஐ களும் மட்டுமே படம் தயாரிக்கும் வாய்ப்பு இருப்பதாக கோடம்பாக்கத் தகவல் தெரிவிக்கிறது.

ஹோமம் வளர்த்த நாத்தீக நடிகர்:

அந்த பிரபலமான நாத்தீக நடிகர் தன் கொள்கை பற்றி எப்போதுமே குழப்பிவருவார். இந்த நிலையில் சென்ற வருடத்தில் கடைசி மாதத்திற்கு முந்தைய மாதம் தன்னுடைய வீட்டில் நள்ளிரவு முதல் அதிகாலை வரை பிரம்மாண்டமாக ஹோமம் வளர்த்ததாக ஒரு கமுக்கத் தகவல் கசிகிறது. இவரின் மேடை பேச்சுகளின் குறுந்தகடுகள் இறை மறுப்போர் கழகத்தில் விற்பனை செய்யப்பட்டு வருகின்றன. இந்த செயலை அறிந்த ஆளை வாரும் ஏரியா நாத்தீக தொண்டர்கள் தங்கள் தலமைக்கு தகவல் தெரிவித்து வருகிறார்களாம். எனவே அவரின் குறுந்தகடுகள் இனிமேல் இவர்களின் நிகழ்ச்சிகளில் விற்பனை செய்யப்படுமா என்பது அவர்களின் முடிவுகளில் தான் தெரியும்.

ஒன்றே சொல் :

என்னைப் பார் யோகம் வரும். சலவைத் தொழிலாளியைப் பார்த்து சிரித்தது கழுதை

நகைச்சுவை நறுக்கு :

(இது வெறும் நகைச்சுவையேயன்றி யாரையும் குறிபிடுவது அல்ல)

உலக காவல்துறையினர் மாநாடு:

அமெரிக்க போலீஸ் : குற்றம் நடந்து 24 மணி நேரத்தில் குற்றம் பற்றிய முழுவிபரம் மற்றும் குற்றவாளி யார் எனத் தெரிந்துவிடும்.

ஸ்காட்லாந்த் போலீஸ்: குற்றம் நடந்து 24 மணி நேரத்தில் குற்றம் பற்றிய முழுவிபரம் மற்றும் குற்றவாளி யார் எனத் தெரிந்துவிடும்.

இந்தியக் காவல்துறை: குற்றம் நடப்பதற்கு 48 மணி நேரத்திற்கு முன்பே குற்றம் பற்றிய முழுவிபரம் மற்றும் குற்றவாளி யார் என எங்களுக்குத் தகவல் வந்துவிடும்.

கானொளி கார்னர் :