அதைக் கேட்பதற்காக தவமாய் தவமிருந்து அந்த எதிரொலியைப் பார்த்துவிட்டு என்ன படம் என அறிந்து கொண்டு அதை ஸ்கூல் முழுவதும் பரப்புவது தான் அன்றைய பிரதானமான ஒரு வேலையாக இருந்தது., வியாழக்கிழமை திரைமலர்,வெள்ளிக்கிழமை ஒலியும் ஒளியும்,சனிக்கிழமை ஹிந்தி திரைப்படம். சனி இரவு முன்னோட்டம். வரும் வார நிகழ்சிகளின் அனிவகுப்பு. ஞாயிற்றுக் கிழமை காலை 9 மணிக்கு காத்தாடி ராமமூர்த்தி,பாண்டு,மனோ நடித்த பஞ்சு பட்டு பீதாம்பரம், காலை 10 மணிக்கு அனைவரும் விரும்பிப் பார்த்த ராமாயணம் மற்றும் மஹாபாரதம் என பட்டையைக் கிளப்ப ஆரம்பித்தது தூர்தர்ஷனின் 1வது மற்றும் 5வது அலைவரிசை நிகழ்ச்சிகள்.

ஞாயிற்றுக்கிழமை மாலை 5.30 க்கு இந்தியத் தொலைக்காட்சிகளில் முதன்முறையாக திரைக்கு வந்து சில வருடங்களே ஆன அதரப் பழசு அட்டுத்திரைப்படம் என தன் பயணத்தை தொடர ஆரம்பித்தது தூர்தர்ஷன். சனிக்கிழமைகளில் ஹிந்திப் படம் பார்க்காத கண்களே அன்றைக்கு லேது (வேற வழி). ஞாயிற்றுக் கிழமை வந்து விட்டால் மாலை 4 மணிக்கே எங்கள் ஊர் பஞ்சாயத்து ஆபிஸ் திடலில் நண்பர்கள் சகிதம் துண்டு விரித்து அமர்ந்துவிடுவோம். 4.30 மணிக்கு அந்தப் பஞ்சாயத்து போர்டு கிளார்க் (அன்றைய கிளார்க் இன்றைய கலெக்டருக்குச் சமம். அவ்வளோ அலம்பல் செய்வார்) வந்ததும் நாங்கள் ஓடிச்சென்று அவரை வரவேற்று அவரின் சைக்கிளை தள்ளிச்சென்று ஓரத்தில் வைப்போம். அதன் சீட்டுக்கு அடியில் இருக்கும் ஒரு பிட்டுத் துணியை எடுத்து அந்த சைக்கிளை சுத்தமாகத் துடைத்து வைப்போம்.

இதே நேரத்தில் எங்கள் நண்பர்கள் யாராவது அவருக்கு டீ வாங்கச் சென்று விடுவார்கள். 4.45க்கு அந்த அலுவலகத்தில் இருக்கும் பெரிய டேபிளை எடுத்து பஞ்சாயத்து போர்டு வராண்டாவில் வைப்போம். பின்னர் அவர் தன் பெல்டில் இருந்து ஒரு சாவிக்கொத்தை எடுத்து ஒரு அறையைத்திறப்பார். அதற்குள் சுத்தமான துணி போட்டு மூடப்பட்ட அந்த கால “டைனோரா டிவி” இருக்கும். அதை 4 பேர் சேர்ந்து தூக்கி வந்து டேபிளில் வைப்போம். இந்த நேரம் மீட்டிங்கிற்கு வரும் மக்கள் கூட்டம் போல கொஞ்சமாக மக்கள் வந்து அமர ஆரம்பிப்பார்கள். டிவியை வைத்த பிறகு உள்ளிருந்து அவர் UMS ஆண்டெனா பூஸ்டரை எடுத்து வந்து அதிலிருந்து கனெக்சனைக் கொடுப்பார்.

டிவியை ஆன் செய்தால் வெள்ளைப் புள்ளியாக வரும். உடனே அந்த ஊரிலேயே மிக ஜீனியஸான அந்தக் கிளார்க் ஒரு சிகெரெட்டை பற்றவைத்துக் கொண்டு அந்த பூஸ்டரையும், டிவி டியூனரையும் திருகு திருகு என திருகிவிடுவார். அப்போதும் சேனல் வராது. உடனே எங்கள் செட்டில் ஒரு பையனை கட்டிடத்தின் மேலே ஏற்றி விடுவார். அவன் அங்கு சென்று ஆண்டெனா கம்பியை அந்தப் பக்கம் இந்தப் பக்கமாக திருகுவான், உடனே சேனல் கிடைத்துவிடும். அதன் பின்னர் அந்த பஞ்சாயத்து போர்டின் பிரசிடென்ட் வருவார். அவருக்கு மட்டும் ஒரு சேர் போடப்படும்.

5.30 க்கு படம் துவங்கும். 7.30 மணிக்கு தலைப்புச்செய்திகள் வரும். அது தான் அனைவருக்கும் இடைவேளை. மூச்சா போகிறவர்கள் மூச்சா போவார்கள். பஞ்சாய்த்து ஆபிஸ் வாசலில் பட்டானிக்கடலை, நிலக்கடலை வியாபாரம் நடக்கும். பின்னர் 7.40 க்கு படம் மீண்டும் துவங்கி 8.30 க்கு நிறைவடையும். 8.30 க்கு செய்தி ஆரம்பித்து 9 மணிக்கு முடியும். திரும்பிப் பார்தால் அந்த பஞ்சாயத்து போர்டு கிளார்க் மட்டும் தான் மிச்சமிருப்பார். அவரே டிவியைத் தூக்கி உள்ளே வைத்து விட்டு வீட்டுக்கு சென்று விடுவார். இது தான் அன்றைய தூர்தர்ஷன் ரசிகர்களின் வாழ்க்கை முறை.

மனதின் ஓரத்தில் புதைந்து கிடக்கும் சில விளம்பரங்கள். வாசிங் பவுடர் நிர்மா, கோல்ட் ஸ்பாட்,ரெடிமணி ஷாப், டைனோரா டிவி, சாலிடர் டிவி, காம்ப்ளான், சன்ட்ராப் சன்பிள்வர் ஆயில் என இன்னமும் அது நினைவுகளில் ஊசலாடுகிறது.

செய்தி வாசிப்பில் திருமதி சோபனா ரவி, திருமதி பாத்திமா பாபு, திரு.ராமகிருஷனன், திரு.வரதராஜன், திரு.நிஜந்தன் போன்றவர்கள் மிகக் குறிப்பிடத்தக்கவர்கள்.

இப்போது தூர்தர்ஷனின் அணிவகுப்பில் மொத்தம் 32 சேனல்கள் இருக்கின்றன.

கேபிள் டிவியின் ஆதிக்கத்தால் தூர்தர்ஷன் சொந்தமாக DD Direct என்ற பெயரில் DDH சேவையைத் துவக்கி இன்றும் அதற்கென தனிக்கூட்டத்தை வைத்திருக்கிறது தூர்தர்ஷன்.