சென்னையிலிருந்து தென்கிழக்கே மையம் கொண்டுள்ள லைலா புயல் காரணமாக தமிழகத்தின் அனைத்துப் பகுதிகளிலும் மிதமானது முதல் கனமழை பெய்து வருகிறது. சென்னையின் அனைத்து சாலைகளிலும் தண்ணீர் தேங்கி போக்குவரத்து மெருமளவு பாதிக்கப்பட்டுள்ளது. சென்னை மெரீனா கடற்கரையில் கடல் சீற்றத்துடன் காணப்படுகிறது. அலைகள் பெரிய அளவில் எழுந்து கடல் நீர் மணல் பரப்பை மூடியிருக்கிறது. சென்னை நகர மக்களின் இயல்பு வாழ்க்கை கடுமையாக பாதிக்கப்பட்டுள்ளது. சில இடங்களில் மரங்கள் முறிந்து சாலையில் விழுந்துள்ளதால் போக்குவரத்து நெரிசல் இன்னமும் நீடிக்கிறது.வேளச்சேரில் அறுந்து கிடந்த மின்கம்பியை மிதித்த பொறியாளர் ஒருவர் உயிரிழந்தார்.தஞ்சை மாவட்டம் பட்டுக்கோட்டையில் அறுந்து கிடந்த மின்கம்பியை மிதித்த 5 வயது சிறுமி உயிரிழந்தார். அதிராம்பட்டினத்தில் இருந்து கடலுக்குள் மீன் பிடிக்கச் சென்ற 3 மீனவர்கள் இதுவரை கரை திரும்பவில்லை. தமிழகத்தின் கடலோர மாவட்டங்களில் கடுமையான காற்றுடன் மழை பெய்து வருகிறது. பலத்த காற்றின் காரணமாக‌ இராமேஸ்வரம் பாம்பன் துறைமுகத்தில் நிறுத்திவைக்கப்பட்டிருந்த 150 க்கும் மேற்பட்ட படகுகள் சேதமடைந்துள்ளது. இதன் காரணமாக கடலோர மீனவ கிராமங்களில் இருக்கும் மீனவர்கள் யாரும் கடலுக்கு மீன் பிடிக்கச் செல்லவில்லை. தமிழகத்தின் வட காலோர மாவட்டங்களில் 60 கிலோ மீட்டர் வேகத்தில் பலத்த காற்று வீசும் எனவும் எச்சரிக்கை விடுக்கப்பட்டுள்ளது. ஆந்திராவில் மீட்புக்குழுவினர் தயார் நிலையில் வைக்கப்பட்டுள்ளனர். இந்த நிலையில் தமிழகம் முழுவதும் இன்னும் 48 மணி நேரத்திற்கு கனமழை நீடிக்கும் என வானிலை ஆய்வு நடுவம் தெரிவித்துள்ளது.