இதேபோன்ற ஒரு எளிமை வாழ்க்கை வாழ்ந்து பொதுஉடமைக்காக தன்உடமையைக் கருத்தில் கொள்ளாத தோழர் உ.ரா வரதராசன் இந்த அவர்களின் எதிர்பாரா மரணம் நம்மை கலங்கவைத்து விட்டது. தன்னுடைய கணவனால் கொடுமை செய்யப்பட்ட ஒரு பெண்ணிற்கு சட்டப்பூர்வமான உதவிகளைச் செய்து வந்த விவகாரம் அவரின் குடும்பத்திலே புயலாய் வீசிவிட்டது. இது கட்சித்தலைமையின் காதுவரை போக‌ இவரை மத்தியக்குழு பதவியில் இருந்து தற்காலிக நீக்கம் செய்து வைத்தது தலைமை. இந்த தொடர் பிரச்சனையால் தன் நிம்மதியைத் தொலைத்த தோழர் உ.ரா.வரதராசன் கடந்த பிப் 11 ஆம் தேதி தன் வீட்டிலிருந்து வெளியேறி எங்கேயோ சென்றுவிட்டார். இதே நாட்களில் கட்சியின் மாநிலக்குழு கூட்டமும் நடைபெற்றதால் அதில் அவர் பங்கேற்காமல் இருக்கவே அவரைத் தேடும் பணி தீவிரமாகியது. இந்த நிலையில் அவரைக் காணவில்லை என அவரது மனைவி சென்னை கமிஷனர் ராஜேந்திரனிடம் புகார் அளித்தார். இந்த நிலையில் கட்சி அலுவலகத்திற்கு தோழர் வரதராசன் எழுதிய இரண்டு கடிதங்கள் வந்தன. அதிலே ஒரு கடிதத்தில் "என் உடலை மருத்துவ ஆராய்ச்சி மாணவர்களிடம் சேர்த்துவிடவும் எனவும், தனக்காக தனது மகள் வாங்கித்தந்த லேப்டாப்பை தீக்கதிர் நாளிதழ் அலுவலகத்திற்கும், தனது வங்கிக்கணக்கில் இருக்கும் பணத்தை கட்சிக்கும்,தன்னுடைய புத்தகங்களை கட்சி நூலகத்திற்கும் சேர்ப்பித்து விடுங்கள் எனவும் எழுதியிருந்தார்.

அவரது இரண்டாவது கடிதத்தில் "மயிர் நீப்பின் வாழா கவரிமான், அன்னார் உயிர் நீப்பின் மானம் வரின்" தற்கொலை செய்து கொள்பவன் கம்னியூஸ்டே அல்ல என்றும் கட்சிப்போராட்டத்தில் எத்தனையோ இடர்பாடுகளைத் தாங்கிய நான் குடும்பப் போராட்டத்தில் நிலைகுலைந்து விட்டேன்" எனவும் தன்னுடைய கடிதத்தில் குறிப்பிட்டு இருந்தார். இந்த கடிதம் கிடைத்தவுடன் கட்சியினரும், குடும்பத்தினரும் தேடுதலை தீவிரப்படுத்தினார்கள்.

அவர் தற்கொலை செய்து கொள்ளப்போவதாக தெளிவாக குறிப்பிட்டிருந்ததால் தேடும் பணி தீவிரமாகியது. இந்த நிலையில் கடந்த 13 ஆம் தேதி போரூர் ஏரியில் இருந்து ஒரு ஆண் சடலம் மீட்கப்பட்டு அது ராயப்பேட்டை அரசு மருத்துவமனை பிரேதக்கிடங்கிலே வைக்கப்பட்டது. கிட்டத்தட்ட 8 நாட்கள் கழித்து தான் அந்த மீட்கப்பட்ட சடலம் தோழருடையதாய் இருக்குமோ என சந்தேகத்தின் அடிப்படையில் அதை அடையாளம் காட்ட குடும்பத்தினரும், சக தோழர்களும் அழைக்கப்பட்டனர். ஒரு பிரபலமான நபர் தொலைந்து போய் விட்டதாக உலகம் முழுவதும் செய்திகள் பரவிக்கொண்டிருக்கும் நேரத்தில் போரூர் டிவிசன் காவல்துறையினருக்கு மட்டும் இந்த தகவல் கிடைக்கவில்லையோ என தான் நினைக்கத்தோன்றுகிறது. பொதுஉடமையாய் போராடிய தோழர் கிட்டத்தட்ட 8 நாட்கள் அனாதை பினமாய் இருந்துள்ளார் என்பது நெஞ்சை பிழிவதாக உள்ளது. எத்தனையோ போராட்டங்களை தைரியமாய் களம் கண்ட தோழர், மிசா காலத்திலே மிக தைரியமாக செயல்பட்ட தோழர் கடைசியிலே தன் வளர்ப்பு மகனால், தன் சக தோழர்களால் கூட அடையாளம் காண முடியாத அளவிற்கு சிதைந்து விட்டார் என்பது எவ்வளவு கொடுமை.

தன்னோடு பணிபுரிந்த சக தாழ்த்தப்பட்ட தோழியருக்கு மறுவாழ்வு அளித்து தன் குடும்ப நலனை விட பொதுநலனை உயிராய் கருதி தன் காலம் முழுவதும் போராட்டமும் ஆர்ப்பாட்டமுமாய் வாழ்ந்த தோழர் உ.ரா. அவர்களின் இந்த முடிவு யாருக்குமே இனி நேரக்கூடாது. தற்கொலை செய்து கொள்வது கொடும் பாவம் என தெரிந்ததால் தான் தன்னுடைய கடிதத்தில் "தற்கொலை செய்து கொள்பவன் கம்னியூஸ்டே அல்ல" என எழுதியிருக்கிறார். அதையெல்லாம் தாண்டி அவரின் விரக்தி நிலை கம்னியூச சித்தாந்தத்தை வென்றுவிட்டது. மயிர் நீப்பின் வாழா கவரி மான் எனச்சொல்லி மீளா இடத்திற்குச் சென்றுவிட்ட அன்னார் சாந்தி பெற பிரார்த்திப்போம்.